O Club Básquet Coruña e o Grupo Osmos, a través do programa “16 partidos, 16 causas”, poñen o foco na Cruz Vermella para dar visibilidade ao traballo que esta organización humanitaria e voluntaria desenvolve en favor das persoas vulnerables, nos ámbitos nacional e internacional.
O labor da Cruz Vermella protagoniza a causa social do partido deste domingo 4 de xaneiro, no que o Leyma Coruña mídese ao Grupo Alega Cantabria ás 12:30 no Coliseum, na Xornada 15 da Primeira FEB.
Cruz Vermella traballa en Galicia desde 1870 e desde entón foise adaptando e transformando para dar resposta ás necesidades das persoas máis vulnerables da nosa comunidade, mellorando a súa calidade de vida, autonomía e favorecendo a súa integración social. Ao mesmo tempo, trata de implicar á cidadanía nas necesidades da poboación doutros lugares do mundo, así como nas emerxencias nacionais e internacionais.
No ano 2023 atendeu a máis de 102.000 persoas en Galicia a través das diferentes áreas de intervención da Cruz Vermella. Algo posible grazas ao traballo das máis de 600 persoas que forman parte do persoal laboral da Organización, e á colaboración dos máis de 19.600 voluntarios/as e máis de 71.000 persoas socias. Unha das súas grandes fortalezas é a súa rede territorial, con 55 puntos de atención para estar preto das persoas na maioría das comarcas de Galicia.