O pivote senegalés formado en España posúe sólida experiencia na Primeira FEB, onde defendeu os escudos do Tizona Burgos, Palencia, Alicante e Estudiantes
O Club Básquet Coruña anuncia a incorporación dun novo xogador ao primeiro equipo para esta tempada 25-26. Serigne MM Sy Dit Dyamil Barro, coñecido como Mus Barro (Pikine, Senegal, 17 de novembro de 1995, 208 cm) é un pivote con ficha cotonú, formado en España e cunha traxectoria ascendente nas ligas do noso país desde a tempada 2016-17, ademais de contar con experiencia internacional.
Tras o seu paso por equipos como o Isover Basket Azuqueca (2016-17), CB Ciudad de Ponferrada (2017-18), A Roda (2018-19) e CD UDEA Alxeciras (2019-20), na tempada 2020-21 deu o salto á LEB Oro con CB Tizona Burgos, onde destacou como un dos xogadores máis valorados da competición. Posteriormente, fichou polo portugués FC Porto e por Palencia Baloncesto (2021-22), e máis tarde polo STB Lle Havre francés (2022-23), onde asinou a súa mellor tempada ofensiva, tras un breve paso polo Gaiteiros de Zulia (Venezuela) no inicio desa tempada.
Nas dúas seguintes campañas compite de novo en España, primeiro no HLA Alicante, onde promediou 9,8 puntos e 5,2 rebotes, e logo no Movistar Estudiantes, con 8 puntos e 4.9 rebotes. Desde alí saltou a México para incorporarse ao Panteras de Aguascalientes que compite na LNBP. Alí completou a súa última campaña, cunha media de 11,5 puntos e 8,6 rebotes.
Moi bo xogador de pick and roll con capacidade para xogar por encima do aro e xerar situacións de tiro próximos ao aro. O seu físico é moi adecuado para realizar as transicións rápidas en contraataque que caracterizan o xogo laranxa. Defensivamente achega a súa capacidade para intimidar, rebotear, e defender o bloqueo directo.
Benvido ao club e á Coruña, Mus!