O Leyma Coruña continúa dando forma ao seu proxecto para a tempada 2026/27 coa incorporación do ala lituano Lukas Uleckas (Kaunas, Lituania, 6 de agosto de 1999).
Con 1,99 metros de altura e capacidade para actuar nas posicións de ala e á-pivote, Uleckas chega ao equipo laranxa tras consolidarse como un dos xogadores máis completos e versátiles da liga lituana. Destaca pola súa intensidade defensiva, a súa capacidade reboteadora e gran lectura de xogo, alén de achegar equilibrio e polivalencia en ambos os lados da pista.
Internacional co seu país en categorías inferiores e formado na prestixiosa canteira do Žalgiris Kaunas, o lituano foi crecendo dentro da estrutura do club ata debutar na campaña 2018-2019 co primeiro equipo e disputar encontros de Euroliga.
Posteriormente acrecentou a súa experiencia en diversos equipos da mesma liga lituana, a LKL, ata a súa definitiva explosión na tempada 2024-25 nas filas do BC Šiauliai, onde asinou unhas medias de 11,5 puntos, 5,8 rebotes e 2 asistencias por partido, consolidándose como un dos mellores aleiros nacionais da competición.
Na última campaña defendeu o escudo do Juventus Utenos, equipo no que continuou a súa progresión e converteuse nun dos seus referentes. As súas estatísticas por encontro foron de 12,3 puntos, 6,3 rebotes e 3,1 asistencias. Así mesmo, Uleckas participou na Basketball Champions League en cinco das seis últimas tempadas, incluída a recentemente finalizada.
Bienvenido ao club e á Coruña, Lukas!